هاتعمل ايه لو اتقبض عليك؟

ملحوظه قبل البدء فى القراءه

هذا الكلام المكتوب هو نصائح للتعامل مع امن الدوله والنيابه التابعه لنظام مبارك قبل ثورة 25 يناير عندما كان اى ناشط سياسى يتم اعتقاله لمجرد انه يعارض نظام مبارك

وقد تم نشر هذه النصائح وتحديثها منذ نشأة الحركه حتى يوم 25 ينايروالان ورغم ما قيل عن تغيير النظام لا نزال نحتفظ به لأن للأسف الشديد لم يتغير النظام الحاكم فى مصر

الكلام المحبوك فى حالة لو لامؤاخذه شقطوك

فيه نقطه مهمه احنا مش واخدين بالنا منها

و هى اننا مش فى رحله

و طبيعى جدا اننا لو عايزين نغير مصر و نصلحها و نخرجها من محنتها .. طبيعى اننا نعانى و نتعب و نتبهدل

احنا بنحارب نظام قمعى مستبد

إحنا مصممين على إننا نصلح بلدنا

ولازم نتوقع التهديدات و البهدله

مفيش شعب فى العالم وصل للتقدم بدون تضحيات و بدون تصميم على الحريه و التقدم

مفيش حاكم مستبد تبرع من تلقاء نفسه بإرساء مبادىء العدل و الحريه

إحنا مشوارنا طويل و محتاج صبر و مجهود

صحيح احنا طول الوقت بنكون حريصين على ان مفيش حد يتم اعتقاله او ايذائه

و لكن لو حصل .. رغم حرصنا .. إيه المشكله

ده الطبيعى … لازم نكون عارفين ان ده ممكن يحصل

و اننا الاقوى

و اننا هانكمل مهما كانت الظروف

و كلها ايام و تعدى و تبقى تجربه نحكيها و نتعلم منها

احنا على الطريق الصح

و هما اللى خايفين من صوتنا

لغاية ما نوصل لحريتنا و نقدر نساعد فى بناء بلد حقيقى فيه مبادىء العدل و الحريه

طبيعى يكون فيه معتقلين و مناضلين

يطلعوا يكملوا طريقهم و التجربه تقويهم

مفيش شعب حر الا و ضحى من اجل حريته

الحريه ليها تمن

و التقدم ليه تمن

لكن فيه بعض النقط الهامه اللى لازم نوضحها:

1- هاتعمل ايه لو اتقبض عليك من مخبرين المباحث او من ظباط القسم أو من حرس الجامعه أثناء نشرك لاى شىء او كتابتك لاى شىء؟؟

اولا الناس دول بيكونوا موظفين و بيطيعوا الاوامر بدون نقاش

بيجيله الامر بالقبض فبينفذه .. بدون تفكير

ساعات بيبقى مش فاهم انت مين

ولما بيعرف انت مين و عايز ايه اكيد بيتعاطف معاك .. بالتأكيد مش هايخرجك و يفرج عنك

لكن لما تتكلم معاه هايعاملك كويس

و كتير منهم هايحاول ينصحك انك تبطل سياسه

و هتلاقى كتير برضه بيشتم فى الحكومه و النظام بس و هو موطى صوته و بيبص حواليه

طبعا اتكلم معاه فى العموم و بدون تفاصيل

و ممكن تنكر اساسا انك ليك فى السياسه و ممكن تعمل عبيط .. مش هاتفرق فى جميع الحالات

و خد بالك انه حتى لو جواه متعاطف معاك لكن برضه بيترعب من انه يخالف الاوامر اللى بتكون جايه من امن الدوله

و حتى لو لسه ما جاتش اوامر بيكون خايف يعمل حاجه تزعل ظباط امن الدوله

يعنى ممكن يكون خايف يدخللك اكل او شرب رغم تعاطفه معاك ألا بتوع امن الدوله يزعلوه

فى الحاله دى لازم تبقى واثق من نفسك اثناء تعاملك مع الشرطه النظاميه بتوع القسم او حرس الجامعه او الترحيلات

ماتسيبش حقوقك و ماتخافش منه

متعاطف معاك او مش متعاطف برضه تصر على حقوقك فى الكلام معاه

حقك فى انه يكلمك بادب و اوعى تسمحله يعللى صوته عليك

حقك فى انك تعرف الناس مكانك فين

حقك فى مكان نضيف تقعد فيه

حقك فى عربيه نضيفه تتنقل بيها

حقك فى اكل و شرب

زعق و زن و هددهم بالفضيحه و انك هاتثبت تجاوزهم للنيابه لو كان خايف يخالف الاوامر او لو طلع غبى

فهمه ان معركتك مش معاه و انه ضحيه زيه زيك

فيه ظباط كتير بيكونوا محترمين و من نفسهم بيعاملوا السياسين احسن معامله

و فيه اللى بيخافوا من امن الدوله و لازم شوية جراءه و ضغوط تعدلهم

و فيه الاغبيا اللى مش بيفهموا و دول لازم معاهم شده.. و ماتسمحش لحد منهم إنه يعلى صوته او يتكلم معاك بطريقه ماتعجبكش أو يخليك تبات مع الجنائيين

2- فى حالة لو ظباط القسم او الجامعه بعتوك على امن الدوله:

هنا بقى يا ريس الوضع مختلف عن الحاله اللى فاتت

ظباط امن الدوله ماينفعش تصيع عليهم بطريقه مباشره

و خد بالك ان ظباط امن الدوله يختلفوا عن الظباط العاديين

ظباط امن الدوله بيبقوا صايعين جدا و بيعرفوا يكذبوا و يمثلوا بمنتهى السهوله

و بيكونوا دارسين علم نفس و بيعرفوا كتير يسيطروا نفسيا على بعض الناس بوسائل كتير و اهمها زعزعة ثقة الشخص فى نفسه

ظباط امن الدوله بيبقوا غالبا عارفين انت مين و تبع ايه

و حتى لو مش عارفين هايبقى كل همه يعرف منك على اكبر قدر من المعلومات و انه يقدر يجندك سواء متأكد انك تبع حاجه او مش متاكد

و ظابط امن الدوله بيبقى شخص مركزه عالى فى الداخليه و ليه صلاحيات بلا حدود .. و ده بيأثر عليهم نفسيا و بيخليهم يفتروا على الناس براحتهم

ظابط امن الدوله بيبقى غالبا شخص بدون اخلاق او مبادىء أو دين

بيبقى كل همه انه يحافظ على مركزه و كل همه انه يبقى ظابط شاطر امام رؤسائه و انه بيقدر يسيطر و يجند عصافير و بيقدر يجيب تقارير سليمه و بيعرف الاحداث قبل وقوعها

حاول تعوم اى معلومات عند ظباط امن الدوله

ماتقولش معلومات اكيده و حاول تتكلم فى اللى معروف اساسا

و خليك مركز فى كل كلمة و نبرة صوته و نبرة صوتك و ماتنساش بتقول ايه علشان هايسألك نفس السؤال كذا مره و بكذا طريقه علشان يتأكد من انك لو كنت بتشتغله ولا لأ

هيحاول يمثل عليك كتير و يخوفك و يرهبك و يقولك هانعمل فيك و نسوى .. نفضله و ماتتهزش

خليك قوى .. و حاول معظم الوقت تكون ساكت و ماتتكلمش الا فى اقل القليل

بلاش تصيع عليه صياعه واضحه علشان هاتستفزه زياده

يعنى بلاش يكون كل يوم بيشوفك فى حزب معين و تقوله انا عمرى ما روحت حزب سياسى

ممكن تقوله عن الناس المحروقين او المعروفين و برضه اتكلم فى العموم

لو تأكدت انه عارف عنك معلومات فعلا .. اكدله اننا حركه سلميه و بنحاول ننقذ مصر من الفوضى و خليك هادىء فى الكلام

لو طلع ظابط سافل و شتمك .. اسكت و قول حسبى الله و نعم الوكيل

احتمال كبير تكون متغمى اساسا و هو بيسألك

استخدامه للعنف من عدمه بيتوقف على طبيعة التيار اللى انت منتمى ليه و قوته و على اتصالك او اتصال الحركه بالاعلام و منظمات حقوق الانسان و المحامين

من الاخر … اللى مالوش ضهر بيتفرم .. و طبعا الاعلام و الفضايح و القضايا بتعملهم مشاكل

و ياما فيه ظباط اتجازوا او اتنقلوا من امن الدوله بسبب انهم افتروا على ناس و الناس شردتلهم و فضحوهم أو طلع للمعتقل ضهر و عمل مشكله لأمن الدوله … فببساطه الظابط اللى بيتصرف من دماغه و بيتصرف بغباء بيضحوا بيه

اغلب الظن انه بعد التهديد هيحاول يجندك باسلوب ناعم و كلام زى احنا مش اعداء و احنا مصريين زيك و مش عايزين منك حاجه الا انك تبلغنا … فى الحاله دى ارفض بإدب .. علشان لو وافقت حتى لو بتسجده لغاية ما تطلع هتلاقيه ما هيصدق و كل لحظه بيكلمك.. اقفل الباب فى وشه من البدايه

و اخيرا ان مش شرط كل اللى تم ذكره عن امن الدوله يتم او يحصل معاك لو تم اعتقالك لا قدر الله .. لو اتعمل قضيه بيكون احتكاكهم بيك اقل و بيبقى لحظة القبض او قبل الافراج فقط

و بيبقى الموضوع رسمى و صعب يعقده

فى المواضيع الرسميه بتشوفهم قليل جدا و ممكن ماتشوفهومش خالص .. و ممكن يتم .. بيتوقف على الظرف و الحاله و اهميتك و اهمية الحركه و درجة ثباتك و قوتك او ضعفك

لكن التفاصيل اللى فاتت بتحصل و زياده فى حالة الاختطاف الغير رسمى أو اللى بدون قضيه او ورق

3- فى حالة لو الموضوع رسمى و بقى فيه تحقيق و قضيه

شوف يا ريس

التعامل مع الشرطه حاجه و مع النيابه حاجه تانيه

لو كنت فى مظاهره او حدث و بتوع امن الدوله حبوا يعاقبوك بتعطيلك او قرص ودنك و تحويل الموضوع لتهم و قضيه

عادى بتحصل كتير و خصوصافى الاحداث الكبيره

بعض القبض و الاحتجاز بتلاقى نفسك رايح النيابه.. و هايبقوا حريصين انك تروح بسرعه من غير محاميين.. و انت خليك حريص على تبليغ الناس بأى صوره ممكن تشوف حد معاه تليفون او تكتب ورقه برقم حد و ترميها فى الشارع و تكتب فيها اتصل بفلان و قوله كذا من فضلك

المهم

لما تدخل النيابه ماتخافش من ظباط امن الدوله

كده دورهم رسميا و نظريا بقى قليل

بيلعبوا هما من وراء الستار

المفروض ان القضاء مستقل و المفروض ان السلطه القضائيه تعتبر رقيب على السلطه التنفيذيه

لكن الواقع غير كده

هتلاقى للأسف وكيل النيابه قدامه تهم محفوظه و مكرره عن تعطيل المرور و تكدير الصفو العام و قلب نظام الحكم و الانضمام لجماعه غير مشروعه و حيازة منشورات

و بالنسبه لموضوع المنشورات حاول ماتتمسكش بورق

بس هو عموما لو ما اتمسكتش بورق هتلاقى ظباط امن الدوله مصورين منشورات على حسابهم و مدخلينها معاك للنيابه

وكيل النيابه بيبقى راجل غلبان جدا

مطحون زيك و حاسس بهمومك و متعاطف معاك

و بيقعد يقوللك الاتهامات اللى مفبركها ظابط امن الدوله

ممكن تلاقى وكيل النيابه بيضحك من سذاجة الاتهامات

و ممكن تلاقيه بيشتم فى الظابط التافه اللى كتب التهم

و ممكن تلاقى وكيل النيابه بيساعدك تقول اجابه صح واتكونش ادانه عليك

لكن فى الاخر

القرار بييجى لوكيل النيابه بالتليفون

احبسهم 15 يوم

حاضر يا فندم

ماتعرفش التليفون بييجى من مين .. من النائب العام ولا من امن الدوله ولا كله زى بعضه

المهم

و انت فى التحقيق الرسمى بيكون امام وكيل النيابه ورق رسمى

بيتهمك بتهم معينه

اجاباتك كلها لازم تكون على الورق الرسمى لازم تكون ذكيه

و فيما يلى سيتم عرض نموذج لتحقيق نيابه مع احد النشطاء السياسيين

و القرار فى الاخر مالوش دعوه لا بالاضراب ولا بالمظاهره ولا بالتهم ولا باى حاجه

القرار بييجى بالتليفون

و الحبس بيبقى هدفه التعطيل و التشتيت و قرصة ودن

4- فى حالة لاقدر الله تم الحبس 15 يوم

معلش يابنى

كلها ايام و هاتعدى حصلت و بتحصل و هاتحصل كتير

كلها ايام و بتخلص

ساعتها بقى لازم يبقى كل همك و انت جوه انك تسترخى و تأنتخ

تأكد ان اللى ما اتمسكش بيبقى كل همه انك تكون مبسوط و انت جوه

بيبقى فيه ناس سهرانين لراحة المحبوس

دى القاعده

المحبوس لازم يانتخ

و انت بدورك يا معلم

قضيها

اضحك و هرج و العب و غنى و ارقص و نام براحتك و اقرى و اتثقف و العب رياضه

ملعون ابو الدنيا

اعتبر نفسك فى اجازه

فى السجن عالم تانى

ليه قواعد تانيه و حياه تانيه و لغه تانيه

اكيد هاتعرفها مع الوقت

اوعى تخاف من الجنائيين لو شفتهم

كلمهم فى السياسه بس

هتلاقيهم احترموك اكتر من نفسهم و حطوك فوق دماغهم

السياسى فى السجن ليه وضع خاص

بيتعامل غير الجنائى طبعا

و برضه لو ظابط السجن خايف من امن الدوله .. لازم يتعدل بكام موقف جامد على كام تهديد بالاضراب عن الطعام

—————————————————————————–

قبل الاستكمال

فيه ملاحظه مهمه

و هى ان قبل اى حدث كبير .. من النادر جدا ان اللى بيتم اعتقاله بيخرج قبل ما اليوم يعدى

مهما كانت الضغوط

و كتير جدا الامن بيستغل حالات الاعتقالات علشان يخلى الناس تتلهى باخراج المعتقلين و يوقفوا كل الشغل و الترتيبات للحدث

مش معنى كده ان اللى يتم اعتقاله قبل الاحداث المهمه اننا نبيعه

لا طبعا

ماينفعش نبيعه

و برضه ماينفعش نوقف كل الترتيبات التانيه

لازم نتقسم كويس

و نكون بجوار المعتقلين و نراعيهم فى الدعم الاعلامى و القانونى و كافة الضغوط الممكنه و توفير كل سبل الراحه ليهم

و بالذات لو كانوا بنات

نرجع تانى لموضوع النيابه

و ده نموذج افتراضى واقعى لسيناريو التحقيق المثالى

*اسمك و سنك و عنوانك

** ….. …….. ……. ……..

س أين كنت يوم الاثنين الموافق 6 ابريل 2009

ج كنت فى الشغل

أو ج كنت بتمشى فى وسط البلد رايح اشترى هدوم

س ما رأيك فى التهم المنسوبه اليك بتعطيل المرور

ج ماحصلش

ٍ ما رأيك فى التهم المنسوبه اليك بالتجمهر اكثر من اربع اشخاص بالمخالفه للقانون

ج انا كنت رايح اشترى هدوم لوحدى

س ما رأيك فى التهم المنسوبه اليك بيحيازة منشورات تحض على قلب نظام الحكم و تدعوا لتكدير السلم العام

ج ولا اعرف حاجه عنها

س بص على المنشور ده كده

ج اول مره اشوفه

س ما اقوالك فى التهم المنسوبه اليك من الظابط فلان الفلانى بانك منضم لحركه شباب 6 ابريل

ج ولا عمرى سمعت عنهم

س ما أقوالك بشأن انضمامك على جروب الفيسبوك

ج معنديش اكونت على الفيسبوك اساسا

س ما رأيك فى التهم المنسوبه اليك من الظابط فلان الفلانى بأنك اعتديت عليه و على القوه المرافقه بالضرب و السب

ج ماحصلش

و هكذا

و ماتنساش تذكر اى تجاوزات حصلت معاك من الظباط فى محضر النيابه

و اوعى توافق على الحضور بدون محامى

لو مفيش محامى ارفض العرض و ارفض تجاوب على اى سؤال الا لو فيه محامى

ملحوظه هامه

اساسا مفيش تهم تعاقب على الكتابه و التدوين على الانترنت

و مفيش تهم تعاقب على الانضمام على جروب الفيسبوك

ولا حتى تهم تعاقب على الانضمام لاى حركه .. الا طبعا الاخوان علشان على اساس دينى و دى ماده فى الدستور

علشان كده تلاحظ ان الاعتقال بيبقى من الشارع

يعنى اثناء الاحداث و الفعاليات

و زى ما قلنا قبل كده

النيابه او الحبس بيبقى كل غرضه هو التعطيل و التكدير و قرص الودن

نيجى بقى للسجن

لازم الاخوات وقت الحبس يبقوا اكتر من اخوات

بمعنى ان كل المحبوسين يراعوا بعض و ننسى لغة الانا

لازم فى السجن نتعاون لاقصى درجه و نتفانى فى خدمة بعض

و نطبق الاشتراكيه على اى اكل او موارد اعاشه او زيارات جايه من الاهالى

صحيح فيه ناس بره بيجروا على راحتنا

بس برضه جوه نحافظ على الموارد و يتم مصادرة اى زيارات جايه لاى فرد و يتم توزيعها على الجميع بالتساوى

ماعدا طبعا الاحتياجات الشخصيه

و ممنوع اى خناقات تافهه على الاكل او السجاير او النوم او المكان

و احب اذكر كذا تجربه

اثناء حبسة اسكندريه فى 23 يوليو 2008

كانت الايام بتجرى بسرعه

كان كل الظباط بيستغربوا اساسا احنا ازاى سياسيين

كنا طول الوقت بغنى و نهرج و نضحك بصوت عالى و ساعات بنلعب استغمايه و نقول نكت

الوقت عدى بسرعه شديده جدا

لدرجة اننا كنا ماشيين من السجن زعلانين

بالمقارنه لاعتقالات 6 ابريل 2008

كان المعتقلين من تيارات مختلفه

و كانت الخلافات سيئه جدا

و تعبوا بعض اكتر ما هما تعبانين بسبب تنشيف الدماغ

و فى اعتقالات نادى القضاه فى ابريل 2006

كان برضه المعتقلين من تيارت مختلف

و كان العدد كبير اكتر من 50 معتقل من كفايه غير كام ميت معتقل من الاخوان

بس كانت الدنيا لطيفه

و الحبسه اتعلمنا فيها كتير جدا

عموما

كله بيعدى

و كله بيخرج فاكر حكايات جميله و مواقف طريفه

و اخيرا هاعيد نشر النصائح اللى نشراها الشبكه العربيه لمعلومات حقوق الانسان

أعرف حقوقك:

ماذا تفعل ؟ ماذا تقول؟

أولا : اذا القي القبض عليك:

الشرطة هي جهة تحريات وليست تحقيق لذلك :

1- لا توقع على أي تحقيق في قسم الشرطة أو أمن الدولة ، على الاطلاق.

2- يجب أن ترى كارنية الضابط أو أمين الشرطة. ، لو قبض عليك.

3- اذا كنت محتجز بشكل غير قانوني ، اترك أي اثر في الزنزانة”مثل كتابة أي شيئ على الجدران ، وتقدم ببلاغ للنيابة باحتجازك دو وجه حق.

4- في تحقيقات النيابة دائما كون مصر على حضور محامي معك.

5- اجاباتك في النيابة دائما “مش أنا ، معرفش ، محصلش ، مش بتاعتي، مش فاكر ….”

6- اطلب قراءة التحقيق في النيابة قبل التوقيع.

7- اطلب تحويلك للكشف الطبي اذا كان عندك اي اصابات.

8- اذا حضر اي شخص لمنزلك دون اذن نيابة ارفض دخوله المنزل.

9- لا تعطي كلمة السر لايميلك أو مدونتك أو حساب الفيس بوك لأي شخص.

10- اترك رسالة في مسودة الموبايل بأنك إعتقلت وارسلها لصديق فور القبض عليك.

11- اخبر وكيل النيابة عن فلوس طلبها امناء الشرطة منك في القسم لان الطبيعى ان كل الحقوق تتم بالرشاوى.

12- اطلب طعاما على نفقة القسم اذا احتجزت ، واخبر النيابة أنهم حرموك من الطعام اذا رفضوا في القسم.

13- اخبر وكيل النيابة بأي شتيمة تعرضت لها.

الشبكة العربية لمعلومات حقوق الإنسان

http://anhri.net/