في مسيره ان شاء الله يوم الخميس الساعه 3 داخل كليه حقوق للشهيد عبدالرحمن "ربنا يرحمه" وهايكوون موجود معانا اتنين من قاده التراس اهلاوووي مشاركين في المسيره دي
"كريـــم عادل"و"عبدينيــــو" ان شاء الله
تم الاتفاق والتنسيق مع الامن و دكتور جابر جاد وكيل كلية حقوق القاهرة وصرح دكتور جابر ان سوف يتم نقل عائلة الشهيد عبدالرحمن بسيارة خاص الى الكلية وهيكون فى استقبالهم وارجو من جميع الطلبة التجمع بزى واحد اسود او احمر والمسيرة هتكون فى الكلية ويريت كلنا نشيرها لرد الجميل لشهيد ولو بصورة معنوية
وشكر خاص للقائمين على تنظيم المسيرة ايمان و عبدالله و ايه واسراء وشيماء وقباني
اربع معيدين شكر خاص ليهم لمساهمتهم بصورة مادية فى المسيرة (سيد عبدالمجيد ــــــــ محمود حسن ـــــــ محمد لطفى
ــــــ سامى حسينى )
هيماا
تفاصيل اخر ايام الشهيد عبدالرحمن فتحي حكاها اعز صديق لعبدالرحمن
عبد الرحمن ماكنش طايش وفوضوي . عبدالرحمن كان بيغسل الجامع كل يوم وبيوعي اصحابه بالمواظبه في الصلاه . وتوقع وفاته في بور سعيد قبل ما يسافر .
قبليها بكام يوم كان قاعد مع ناس صحابه في العمرانيه وهو بيحبهم جدا
وبعد كدا كان عازمهم يوم الخميس عنده الي هو اليوم اللى اتاخد فيه عزاه
رجع عدا عليا قالي اعمل حسابك الخميس ضبط نفسك الناس جايه لازم نمشيهم مبسوطين عشان دول رجاله
قولتلوا ماشي وبعد كدا مشي
في اليوم الي بعده قالي انا استخرت ربنا اروح الماتش ولا ادفع فلوس دخله ماتش الاهلي والزمالك فا ربنا خيرني ان اروح الماتش فضلت اقولوا بلاش محدش مننا رايح لكن هو صمم .
وهو كان دايما يستخير ربنا في كل حاجه حتي في المتشات وكان ديما ينصحني ادخل المسجد الي جنب بيتهم
وكان دايما ينضف المسجد ويغسل الدواسات وفلاتر التكيف ويعتكف في الجامع
بجد كان انسان بيعمل كل حاجه كويسه وفي نفس الوقت كان عايش الحياه
وبعد كدا جيه ليله المباراه كنت قاعد انا وهو وصاحبه التالت كان بيحبه جدا اكتر مني
فاقلتلوا ايه يا جروب
راح سلم وعمل حركه عارف انها بتضيقني قاصد يرخم بهزار
بعد كدا راح قال لصاحبنا هات الشنطه اروح بيها راح صاحبنا قالوا بهزار بس لو مت احنا عايزين الشنطه تجبها اهم حاجه
بعد كدا قلتلوا انت واخد حاجه معاك قال لا
وقولتلوا طيب خلي بالك من نفسك
وفضلنا نهزر وقالي انا داخل البس الكوتشي الي بتفائل بيه
ودخل وكانت اخر مره اشوفه كان لابس ايس كاب وبقولوا انت رايح تسرق
قالي تفتكر انا لو انا جرالي حاجه الناس بتاعت الجروب هتسأل فيا ؟
قولناله يا عم اه اكيد دا انتا صاحبهم فكان بيقول بهزار طب انا بوصيكم تخلوا كله يجي عزايا
تاني يوم نزلت الصبح الساعه 9 شغل وكلمته انا وصاحبي وقلتله انت فين قالي سواقين الاتوبيس خافوا فا انا راكب قطر متقولش لوالدي عشان ما يتخضش عليا
وقلتلوا ياد لو في حاجه اتصل بيا اجي اجيبك وقالي طيب سلام
ودي اخر كلمه سمعتها منه .
**************************************************
كانت تلك كلمة أصدقاء الشهيد.الى الجنة بأذن الله.وأنا لله وأنا أليه لراجعون *
**************************************************
No comments:
Post a Comment
Note: Only a member of this blog may post a comment.