شغل مخك

يعنى إيه عميل؟ ج: العميل ده بيبقى واحد مزروع علشان يحقق مصالح أعداء بلده، طيب العميل ده مش المفروض يبقى فى موضع سلطة أو فى الحكم علشان يحقق مصلحة أعداء الوطن؟ ج: المفروض، طيب ليه الأجهزة الأمنية والمخابرات مش بيمسكوا العملا سواء فى السلطة أو بره السلطة ويحاكموهم بقى ويخلصوا الوطن من شرهم؟ ج: ماعرفش اسألهم، يمكن مش عملا، هل ينفع العملا دول يشاركوا فى الثورة؟ ج: مستحيل ناس تدعو أو تشارك فى ثورة ويبقوا مستعدين للتضحية بعمرهم ويبقوا عملا، هى إيه الأجندات دى؟ ج: الأجندت دى هى اللى بنجيبها من الفجالة أو من أى مكتبة ونكتب فيها طوال السنة، لأ قصدى على الأجندات الأجنبية؟ ج: أه دى قصدهم إنها أجندات فيها تعليمات أجنبية بينفذها العملا، طيب بتبقى عاملة إزاى ومكتوب فيها إيه؟ ج: معرفش والله اسأل اللى بيقولوا، هى أمريكا دى عدوة لمصر؟ ج: أنا سمعت الكلام ده من لجنة التحقيق التابعة للسلطة ومن بعض وسائل الإعلام القريبة من السلطة سواء المجلس أو الحكومة، طيب طالما أمريكا دى عدوة لمصر وعايزة تخربها وتقسمها ليه مانقطعش العلاقه معها بقى أحسن ونعرف الناس إنها عدوة؟ ج: ماعرفش اسأل اللى بيقول، إزاى دولة عدوة لينا زى أمريكا وناخد منها معونة عسكرية واقتصادية كل سنة بتوصل لـ2 مليار دولار؟ معرفش اسأل اللى بياخدوا المعونة، طيب إزاى أمريكا عدوة لمصر وبنخليها تدى أسلحة لجيشنا وتدرب قياداته؟ ج: ماعرفش اسأل اللى بيتدرب، هو صحيح إن المجتمع المدنى دول خونة؟ ج: اللى بيقولك كده جاهل أو عايز يخليك جاهل، هو صحيح منظمات المجتمع المدنى بياخدوا تمويل خارجى؟ ج: طبيبعى ياخدوا تمويل خارجى وداخلى أمال هايصرفوا إزاى على أنشطتهم، هو إيه التمويل الخارجى ده أصلا؟ ج: ده بيبقى تمويل باتفاقات دولية بعضها بيروح للحكومات كمساعدات اقتصادية أو صحية أو تنموية أو عسكرية وكذلك للمجتمع المدنى، وبيبقى عليه رقابة من الدول اللى بتمنح ومن الجهات الرقابية فى الدول المتلقية، طيب هل الحركات السياسية زى 6 أبريل بتاخد تمويل خارجى وعُملا وأجندات؟ ج: تقرير تقصى الحقائق لوزارة العدل أثبت إن مفيش مليم تمويل، ولو كانوا عُملا كانوا قبضوا عليهم، طيب ليه الحرب على الحركات اللى كان ليها دور فى الثورة وكمان على المجتمع المدنى؟ ج: علشان النظام اللى بيحكم مصر اللى هو نفسه نظام مبارك بس بشكل جديد ناوى يصفى الحركات اللى كان ليها دور فى الثورة، يعنى الحركات الثورية والمجتمع المدنى دول مش خونة زى ما بيقولوا؟ ج: يعنى إيه خونة، ولو خونة ليه ماقبضوش عليهم، وإزاى اللى أطلقوا شرارة الثورة وبقالهم سنين بيناضلوا يبقوا خونة، وهى الثورة دى مؤامرة زى ما الجهلة والخبثاء بيقولوا؟، بص يابنى، أمريكا كانت بتدعم مبارك وخايفة من حدوث ثورة، وحاليا بتدعم نظامه اللى على رأسه المجلس العسكرى، الموضوع كله حفاظ على مصالح وكل التمثيليات اللى بتحصل بينهم ضحك على الدقون واستغلال للمشاعر القومية واستغلال للبسطاء، فكر شوية وشغل مخك.