شوية فضفضه ورغي ملوش اي لازمه
- بس هعرفكم بيا الاولمن اسره متوسطه جداا ماديا ولكن غنيه جدا بتربيتنا,خريجة كلية اعلام قسم اذاعه وتلفزيون ومن الاوائل علي دفعتيبنت وحيده ل 3 شباب اخويه الكبير تامر متزوج و عايش في استراليا وانا خريجة اعلام جامعة مصروموكا اخويه خريج كمبيوتر من مودرن اكاديمي وحمبزه اخر العنقود اخويه في كلية هندسه جامعه عين شمس
- بشتغل مذيعه واخر تجربه ليا كانت في قناة المحور برنامج (صوت التحرير) وطبعا حاولت اشتغل كتير ولكن امن الدوله كان بيرهب اي حد يشغلنا عامة فكنا بنرفد باسرع مما تتخيلوا
- متابعه كل حملات التشويه ال ضدنا كحركة 6 ابريل او ضدي شخصيا وعلي فكره الحمله دي مش جديده عليا ولكننا اتعودنا عليها وكانت بدايتها في 2009 مع نجاح مؤتمر القله المندسه ال كان مؤتمر موازي لمؤتمر الحزب الوطني وهدفه كشف اكاذيبهم و كنت المسئوله عن المؤتمر انا ومحمد عادل ولما بدات حمله التشويه قولنا يبقي نجحنا واثرنا فيهم وسخرو وقتها شباب الحزب الوطني ال ملهمش شغله وقعدوهم ع مكاتب ويقبضوهم 1200 جنيه شهريا وكل مهمتهم هي شتيمتنا وكانت اول مره بالنسبالي اشوف شتيمتي او اشوف صوره ليا بره بروفايلي واعضاء اللجنه الالكترونيه كانو بيستخدمو نفس الاسلوب المتبع دلوقتي وده طبيعي لان المشغلهم واحد ومش هتفرق كتير من مبارك ل مجلس مبارك
وكانت الصوره الوحيده الشغالين عليها هي صورتي انا واخويا الخدوها من بروفايلي !!ايون اخويه الصغير حمبزه وكنا فمصيف فاسكندريه وماما صورتهالنا ورجعت حطيتها ع بروفايلي ,,ايون ايون هي دي الصوره الشهيره الشايلني فيها ولد اسمر يبقي اخويه الصغير
- المهم ان وقتها شفت الشتايم علي الصوره فحملة التشويه وكنت مضايقه بس من التعليقات القذره عليها ونشروها باسلوب قذر وبتعليقات اقذر ووقتها مش اهتميت وقلت مش هرد علي ناس قذره بالشكل ده وانتو عارفين بقي الواحد لما يبقي واثق في نفسه وانه صح مش بيهمه حد واصلا ده اخويا وبالتالي كان التجاهل هو الحل و ووقتها قلت مش هسمح لحد انه يعطلني ويحطني في موقف الدفاع عن النفس وكأني متهمه ,كان العايز بجد يفهم كان بيراسلني وكنت برد عليه وافهمه الحقيقه وكانت كل ما الحمله تزيد اعرف اننا صح واننا الاقوي ولو حد فينا ضعف كنا بنقوي بعض ونكمل ونقع ونقوم تاني ونكمل وكنا بنحلم دايما بالثوره وكنا اوقات نتخيل نفسنا هنكون فين بعد الثوره ودور كل واحد فينا ايه؟ونضحك وال قاعدين معانا يضحكو ويقولو احلمو يا مجانين وكنا بنكمل حلمنا واحنا واثقين اننا نقدر وهنقدر وحلمنا باسقاط مبارك وباسقاطه تسقط معاه كل الحثاله دول الشغلتهم تشويهناوكنت بقول بكره البلد تنضف واتحقق حلمنا والملايين هتفوا معانا الشعب يريد اسقاط النظام ويسقط يسقط حسني مبارك بعد ما كنا 200 300 واحد بيهتفو بقينا ملايين بس ده مش حلم دي حقيقه واخيراا قدرنا معقوله؟؟؟ اخيرا حلمنا اتحقق؟؟؟بس يا سيدي وقامت الثوره وافتكرت ان البلد نضفت من الاشكال دي وطبعا زي مانتو عارفين الجيش حمي الثوره !!! وبالتالي طبيعي جدا ان نفس اللجنه الالكترونيه تستمر في شغلها وبقوه ولكن اصبحت تابعه لمجلس مبارك ,ما هو من مبارك لطنطاوي يا قلبي لا تحزن وبرعايه ابناء مبارك و الشئون المعنوية و التحريات العسكرية .
والحمله بقت اكتر شراسه وقوه لانها مش بس علي الفيس واليوتيوب لفيديوهات مفبركه ولكنها تحولت الي اقلام سخرت فقط لتشويهنا وبرامج علي فضائيات (برامج تزغيط البط علي برامج كوره علي برامج دينيه ) تعمل فقط من اجل تشويهنا وتشويه الحلم فانتشرت بقوه .اوقات لا نتحملها واوقات تعطينا القوه والدفع للاستمرار ونفكر نفسنا اننا ابريلين يعني وحووش وعفاريت يعني تلاقينا في كل حاره وشارع يعني قلبنا ميت عمرنا ماخوفنا وكنا بنفخر ونقول احنا ولاد الشارع مش بتوع مكاتب ,وعشان مقتنعين ومصدقين حلمنا كان حلمنا بيبقي اقوي من اي تشويه اواستدعاء من امن الدوله او تفتيش فالبيت او حتي ضربنا وسحلنا فالشارع واقوي من اي تهديد من اي حقير في امن الدوله واقوي من خسارتنا من شغلنا ورفدنا وكان ساعات كتير بيقي اقوي وعلي حساب حياتنا الشخصيه ,بس كله يهون عشانك يابلدي,
نكمل بقي الحدوته دلوقتي بقي فيه جديد وهو النيولوك وعمليات التجميل.....تاتاتاتامش متابعه بصراحه وصلو لكام عمليه وانا اصلا علاقتي بالتجميل اخرها معايا اغير لون شعري - ومع العلم اني اصلا بخاف من الدكاتره ومش عامله حتي اللوز ال كل سنه لازم يجيلي احتقان بسبب اللوز بس ماعلينااقولكم علي سر بقي؟؟انا مش بضايق من الاشاعه دي لسبب واحد لاني بنت واي بنت بتفرح لما يتقال عليها كده والطبيعي في عالم البنات لو انت شاب وواقف معاك بنات وجات بنت جميله عاكستها او بصيت عليها ,اول حاجه البنات ال معاك تقولها ...دي تلاقيها عامله 10الاف عملية تجميل ويطلعو في البنيه القطط الفاطسه,فأحب أقولكم ايون انا عارفه اني جميله بس أعمل ايه دي خلقة ربنا ال مبسوطه جداا بيهاوبما اننا للاسف مجتمع نصه بيحكم علي الكتاب من عنوانه من غير ما يقراه ,الجمال عمره ماكان جمال الشكلانا بعتبر نفسي جميله بالجمال الحقيقي وهو الجمال الداخلي ال بدوره بينعكس علي الشكل الخارجيبعتبر نفسي جميله لاني بخاف الله اكتر ما بخاف من عبد واتربيت علي كده,جميلة بأخلاقي واحترامي للغير حتي لو الغير غلط فيا, جميله بحبي لكل الناس وبحب الناس ليا .جميلة بالتسامح والرضا عن النفس ال عندي ,,جميله بأهلي الفخوره بيهم وفخورين بيا ,حاجات كتير اوي لو قولتها مش هخلص ...ايون ايون عارفه اني متواضعه )):
نرجع بقي للصوره الشهيره ال بيقولو فيها انها انا مع هيلاري كلنتون في مؤتمر بامريكا ,للعلم فقط انا اصلا مش معايا باسبور ونفسي اول مااطلعه اسافر لتامر اخويه استراليا وملحوظه تانيه (فيه تناقض رهيب جداا فحملة التشويه الساده مخدوش بالهم منها وهو الصورتين في 2009 الشغالين تشويه عليها يعني صورتي انا وحمبزه في 2009 والصوره المنسوبه ليا مع هيلاري كلينتون برضه في 2009 يبقي ازاي قبل النيولوك والعمليات ؟؟؟انتو عارفين بقي بعيد عن سعادتي وابتسامتي مع كل البيقولو اني جميله والسبب في جمالي هو العمليات والصوره الشهيره المنسوبه ليا قبل العمليه للعلم هي للكاتبه والمدونه مي كسبةتخيلو بقي حطيت نفسي مكانها و تخيلو وهي بتقرا التعليقات السخيفه اللي بتصفها بالدميمه وغيرها من التعليقات وان بيتم تشويها فقط لتشويهي وتخيلو انها عاجزه عن الرد والدفاع عن نفسها,كنت اتمني تختلف او تتفق معها ومع فكرة سفرها تحضر مؤتمر في استغفر الله العظيم امريكا وتتناقش معاها وتعطيها مساحه للرد يا تقنعك وتقولك اطلبو العلم ولو فالصين او تقنعها انت برايك.,انا كنت عاجزه عن الرد السنين دي كلها بمزاجي ولاني شايفه الحمله كلها تافهه متستهلش اصلا انكم تقرو الكلام ده كله,وكنت مكتفيه بعرض الصور علي بروفايلي لانها اصلا متاخده من بروفايلي ,مش اسرار عسكريه يعنيتخيلو بقي هذه الكاتبه المدونه الشابه (مي كسبة) تسب وتوصف بأقبح الاوصاف فقط لمجرد تشويهي انا ؟؟؟ ولذلك اعتذر لكي يا مي عن ماصدر من بعض الاغبياء واقول لكي انتي جميله بعيون من يعرفك لانه يعرف الانسانه , معني الانسانيه التي حرم منها البعض
وأقول لكل اعضاء اللجنه الالكترونيه واصحاب حملة (شوهني شكرا ) شدو حيلكم شويه وجددو عشان انا زهقت من استخدام نفس الصور وال اخرها صوري في فرح ندي ومحمد محمود اعضاء المكتب السياسي فالحركه وكان الفرح في 2010 والصوره منشوره بتعليقات انجي حمدي في سهره خاصهوصورة خطوبه ندي ومحمد برضه (الانا فالحقيقه اتشئمت من فرحهم وكرهت اليوم الحضرتلهم فيه فرح ) الصوره دي فخطوبتهم تقريبا في اواخر 2009 او اوائل 2010 مش فاكره بالظبط والصوره تنشر علي انها فرح بعد الثوره تحضره اسماء محفوظ وانجي حمدي ويرقصون علي جثث الشهداء !!!!اما من يردد عميله وخاينه ومموله فاقول لكم اذاا كان حبي لبلدي وحلمي اني اشوفها مثل ما تستحق ومثل ما احلم بها واذا كان محاربتي للظلم والفساد ومطالبتي بدولة القانون والعدل والمساواه وتحقيق العداله الاجتماعيه في نظركم عماله وخيانه ,اذن فشرف لي ان اكون عميله وخائنه وكل ماتتهموني به
واخيرا عزيزي عضو اللجنه الالكترونيه واعضاء حملة (شوهني شكرا) برعاية الشئون المعنويه والمخابرات الحربيه | وابناء مبارك وغيرهم احب اقولكم استمرووو في تشويهكم لنا فتأكدوا مفيش حاجه هتقدر توقفنا عن تحقيق حلمنا ,بمصر متقدمه بتحقيق الحريه والكرامه والعداله الاجتماعيه ,بمصر دولة المؤسسات والقانون ال يحميني ويحميك ,بمصر ال نعيش فيها احرار مش عبيد للقرش ولا للسلطه ,الحلم الانتو متعرفوش تحلموا لان الأحلام للاحرار مش للعبيد,وتأكدوا مفيش حاجه هتقدر تمنعنا عن تحقيق حلمنا
مهما بذلتم من مجهوداً لتشويهنا متمنين احباطنا ,نحن شباب غير قابل للهزيمة، فلا يوجد احد قادرعلى أن يحيد بنا عن طريقنا.. لا بالتشوية ولا بالإعتقال ولا بالتخويف ولا بالسلاح، ولا بالترهيب سيجبرنا أحد على التخلي عن إيماننا بربنا وبأن هذا الوطن بكل ما له وما عليه، يستحق أن نبذل سمعتنا وجهدنا وعمرنا وأخيراً حياتنا من أجله.. وفروا مجهودكم، فكل فشل يصادفنا سيكون دافعاً للتصميم على النجاح فيما يلي من الأيام ,تشويهكم لنا لن ينال من عزيمتنا وارادتنا بل يزيدنا اصرارا والحق لابد ان ينتصر في النهايه
انا ومامتي واخويه وكنا راجعين من المستشفي ببابا وبنحاول نضحك ماما واتمني تحترمو خصوصياتي بقي في اني خبيت وش امي
صور ليا من 2005 ل 2012
انا واسماء وامل في خطوبة ندي ومحمد محمود في 2009 تقريبا قبل الثوره بكتيرررررررر
في فرح ندي ومحمد محمود وقدامي سبرايت واستغفر الله العظيم بضحك
ده الفرح الشؤم لندي ومحمد محمود اعضاء المكتب السياسي بالحركه وتوبه احضرلكم مناسبه تاني )):
No comments:
Post a Comment
Note: Only a member of this blog may post a comment.